بختيار وهابزاده دن دوكتور جواد هيئته حصر اولونموش اثر

بيچاق – قلم

« وارليق » مجلّه سي نين ناشيري جرّاح – اديب جواد هيئته

اينسانا خيدمتدير مرامين سنين
سن عؤمرون بويونجا عؤمور اوزاتميسان.
جرّاح بيچاغييلا مين – مين خسته نين
آغرئ – آجيسينئ كسيب آتميسان

خسته يله برابر سئويندين سنده
جيسماني بير درده علاج ائدنده...

معنوي دردلرسه قالدئ علاجسيز
بس اونون درمانئ نه ايميش گؤرن؟
جرّاح بيچاغييلا گؤردون كي يالنيز
جيسماني آغرينئ كسه بيلرسن...

بير خالقين معنوي آغريلارينا
علاجئ ، قارداشيم قلمده گؤردون
گوندوزلر بيچاقلا كسمك بير يانا
گئجه لر الينه قلم گؤتوردون.

يارئ يا بؤلونموش آنا وطنين
بو گون سندن اومور دردينه ملهم.

قارداش قوشالاشدئ سيلاحين سنين
گوندوزلر – بيچاقدير ، گئجه لر – قلم .

سن سؤزه چئويردين ايضطيرابلارئ
يازدين ، بير حسرتدن مين درد گؤيردي.
الينده بيرينين آزار – بئزارئ
الينده بير خالقين يوز ايلليك دردي.

گئجه ده ، گوندوزده هئي دؤيوشورسن
معنوي ، جيسماني آغريلارلا سن.
حكيم نوسخه لري يازدين هميشه
خسته ن شفا تاپيب ساغالدئ...فقط
اديب قلمله يازديغين نوسخه
بير خالقين دردينه شفادير البت!

ياز كي ، بوتؤو ايديك ، پارچالانميشيق
او تايدان دونيايا سسين اوجالسين.
يازكي ، قلميندن سوزولن ايشيق
وطندن وطنه بير كؤرپو سالسين!



10 اوكتيابر 1982

شهريار

آزادليق قوشو « وارليق»

هر چند قورتولماق هله يوخ دارليغيميزدان

آمّا بير آزادليق دوغولوب وارليغيميزدان

« وارليق » نه بيزيم تكجه آزادليق قوشوموزدور

بير موژده ده وئرميش بيزه همكارليغيميزدان

به به ، نه شيرين ديللي بو جنّت قوشو طوطي

قندين آليب ايلهام ايله ديندارليغيميزدان

ديل آچماغا كارليق دا گئدر كورلوغوموزدا

چون لالليغيميز دوغموش ايدي كارليغيميزدان

دوشمن بيزي ال بير گؤره تسليم اولو ناچار

تسليم اوْلوروق دوشمنه ناچارليغيميزدان

هر اينقيلابين وور – ييخئ سون بنّاليق ايستر

دستور گرك آلماق داها معمارليغيميزدان

هوشيار اوْلاسيز دوشمني مغلوب ائده جكسيز

دوشمنلريميز قورخوري هوشيارليغيميزدان

«بيرليك» يارادين ، سؤز، بير اوْلار بيز كيشيلرده

يوخلوقلاريميز بيتديره جك وارليغيميزدان

تبريز 1979